ماهي إلا مرا...!!
هاكة قالها...رئيس ما تجوز عليه كان الرحمة توة...
وصلاتو للكرسي.. اكثر من مليون مرا...
المرا الي هانونها في عيد ربي العالمين..بقصان الماء..
المرا الي قتلو صغارها عالولادة...و يقولو غلطة...
المرا الي خرجت في كل غصرة و ازمة و كانت اقوى نصرة...
المرا العريانة و المغطية...المرا المحافظة و المتحررة...
المرا التونسية إلي لخصوها في قسمة على إثنين متاع ورثة...
المرا إلي ما يتذكروها..كان وقت حطان الورقة...
المرا الحرة والمقدية... الخرنانة و القوية..
المرا الي تقلبت بيها كميونة...قتلتها على حافة الثنية...
المرا إلي اليوم.. وخروه عيدها لإلتزامات رئاسية...
بربي..بربي... يا جماعة السياسة و اللعب المسخة...
الحر فيكم..ما يجبدش المرا في حملتو الإنتخابية....
و إنت يا مرا...إنت يا شريكة الحياة و خارجة من الضلعة...
كل عام و إنت تحلى بوجودك بيناتنا...
كل عام و إنت الوردة إلي الجنان يقدرها...
كل عيد و إنت بخير شعلة البلاد و زينتها...
كل عيد و إنت لبوك و زوجك و ولدك...أحلى هدية
كل عيد وإنت من صديقك و زميلك و جارك.. تلقى التحية
كل عام و إنت بخير مع إلي يعرف قيمتك....
********************
عربي همامي
ليست هناك تعليقات:
إرسال تعليق