فرحان في شرطي انقتل
أو عسكري بيموت
في ابنك اللي اندبح
وفجروه بريموت
أو أخ لك واندهس
وهشمه النبوت
أو جارك اللي عجز
وصار مناه الموت
شمتان في مين ياغبي
عمر الرجال ما تموت
--------
فرحان في بيت انهدم
كان بيأوي أهلك فيه
بعد الأمان والدفا
ترضى الشتات والتيه
مشتاق تدوق المذلة
وانت غريب عنيه
يحلى لك الإحسان
وتمد إيدك ليه
وانت اللي كنت زمان
كاسي الفقير وكافيه
--------
تهدم إيديك مصنعك
اللي اتبنى بالدم
سالت بحور م العرق
والصبر لما تم
بنوه جدودك عشانك
ويعلو مصر الأم
تسلمه لخراب
وتسيب ضناك للهم
مين اللي يعمل كدا
ويقطع في صدر الأم
--------
شمتان في وطن ارتوى
بالدم لاجل تعيش
حفظوه لك الأجداد
وصانوه بأعظم جيش
عايزينك في عز تدوم
شامخ ما تتذليش
تلقى الأمان والسكن
كافي الشراب والعيش
فخرك أمام الكون
عزك وغيره مفيش
-------
صوت الثكالى بيطربك
وتكون سعيد
نار الأرامل تفرحك
ومناك تزيد
دمع اليتامى بيشبعك
وبكا الوليد
ولا صراخ الأم
على قبر الشهيد
لا الحر أخلاقه كدا
ولا حتى أخلاق العبيد
--------
لو كنت حييت علم
في الصبح كل طابور
ورضعت حب الوطن
وشربت نيله طهور
وقريت في مجد الأمم
اللي هداها النور
وعرفت ليه ربنا
خصه بجند جسور
وبإسم دون الأمم
في كتابه المسطور
وطن وباركه الرسل
وعليه تجلى النور
روح الإيمان فطرته
وبالأمان محظور
لو كنت تعرف كدا
ما كنت يوم مأجور
أحمد محمود عوض سعيد
الرحامنة/فارسكور/دمياط
ليست هناك تعليقات:
إرسال تعليق